20 снежня навучэнцы гімназіі № 43 г. Мінска пазнаёміліся з Дзіцячым прававым сайтам. Для іх адбылося навучальнае мерапрыемства, прысвечанае прававой асвеце непаўналетніх.
Рэдактар сайта Марына Галаенка прэзентавала змястоўны складнік і функцыянальныя магчымасці рэсурсу.
Асаблівая ўвага дзяцей была акцэнтавана на іх правах і абавязках згодна з беларускім заканадаўствам. Таксама рабяты даведаліся пра такія важныя прававыя акты, як Канстытуцыя, Кодэкс аб адукацыі і Закон «Аб правах дзіцяці», якому нядаўна споўнілася 30 гадоў.
Дзеці ў адаптаванай форме вывучылі правы на імя, грамадзянства, адукацыю, адпачынак і працу, а таксама абавязкі па клопаце аб бацьках, атрыманні ведаў, беражлівых адносінах да нацыянальнай спадчыны і навакольнага асяроддзя.
Дзеці захоплена слухалі і прыводзілі прыклады рэалізацыі ўказаных правоў і абавязкаў.
Трэцякласнікі зазірнулі ў Буквар прававых тэрмінаў і паняццяў, на падставе якога створана гульня «Прававы кракадзіл або #дзеці маюць права». З вялізным задавальненнем яны пагулялі ў гэтую гульню і паабяцалі, што далейшае яе правядзенне стане добрай традыцыяй класа.
Пагаварылі таксама аб правах па гадах: часе працаўладкавання, атрыманні пашпарта, здзяйсненні дробных бытавых здзелак і г.д.
Без увагі не засталася і адказнасць непаўналетніх, у тым ліку за абразу ў сетцы Інтэрнэт.
«Трэба выконваць законы. Рабяты, памятайце, што за шкоду, нанесеную вамі, да 14 гадоў адказваюць бацькі», – адзначыла рэдактар сайта.
Для замацавання пройдзенага матэрыялу ўсе разам паглядзелі відэаролік аб правах і абавязках дзяцей. Стваральнікамі гэтага роліка з'яўляюцца аднагодкі трэцякласнікаў – пераможцы конкурсу Дзіцячага прававога сайта «Прававы лайфхак «У мяне шчаслівае дзяцінства - гэта маё права».
Стань удзельнікам нашых конкурсаў і ты! Сачы за навінамі.