Штогод на пачатку навучальнага года работнікі Нацыянальнага цэнтра прававой інфармацыі (НЦПІ) і яго рэгіянальных філіялаў (РЦПІ) бяруць удзел у розных акцыях і тэматычных мерапрыемствах, прымеркаваных да гэтага свята. Бягучы год не стаў выключэннем.
Напярэдадні 1 Верасня калектыў НЦПІ павіншаваў дзяцей і педагогаў падшэфных сацыяльных прытулкаў (ДУА Клецкага і Нясвіжскага раённых сацыяльна-педагагічных цэнтраў) са святам.
Выхаванцам-школьнікам уручаны тэматычныя падарункі: канцылярскія прыналежнасці, адзенне, абутак, спортінвентар.
Не засталіся без увагі і маляты-дашкаляты, іх парадавалі наборамі для творчасці, цацкамі, а таксама пастараліся стварыць атмасферу клопату, цеплыні і ўтульнасці.
Намеснік дырэктара Цэнтра Вячаслаў Бякета павіншаваў дзяцей з пачаткам навучальнага года, пажадаў ім моцнага здароўя, поспехаў і дасягненняў у навучанні, а ў Год народнага адзінства – стаць годнымі грамадзянамі і патрыётамі нашай краіны.
У Дзень ведаў работнікі НЦПІ і РЦПІ прынялі ўдзел у святочных мерапрыемствах.
Прэзентацыю Дзіцячага прававога сайта старшакласнікам прававога 10 класа сярэдняй школы № 116 г. Мінска на першым уроку «Адзінства беларускага народа – аснова незалежнай краіны» арганізавала вядучы спецыяліст упраўлення інфармацыйнай палітыкі і інтэрнэт-рэсурсаў НЦПІ, рэдактар Дзіцячага прававога сайта Марына Галаенка.
Вучні даведаліся аб тым, як набыць прававую граматнасць, дзе знайсці прававую інфармацыю і куды звярнуцца па юрыдычную дапамогу.
РЦПІ Брэсцкай вобласці прыняў удзел у сумеснай з Упраўленнем ДАІ УУС Брэсцкага аблвыканкама акцыі «Увага – дзеці!».
Супрацоўнікі Дзяржаўтаінспекцыі праверылі выкананне правілаў дарожнага руху па пропуску пешаходаў каля ўстаноў адукацыі, а спецыялісты РЦПІ парадавалі дзяцей падарункамі ад mir.pravo.by.
Акрамя таго, работнікі філіяла павіншавалі навучэнцаў 5-х класаў правазнаўчай накіраванасці ДУА «Сярэдняя школа № 28 г. Брэста» з Днём ведаў і расказалі аб карысным памочніку ў будучым навучанні – Дзіцячым прававым сайце.
На ўрачыстай лінейцы ДУА «Воранаўская сярэдняя школа Віцебскага раёна» дырэктар РЦПІ Віцебскай вобласці Ларыса Дорагава павіншавала дзяцей і педагагічны калектыў школы з пачаткам навучальнага года і ўручыла першакласнікам памятныя сувеніры і паветраныя шары ад НЦПІ.
Ва ўрачыстай абстаноўцы спецыялісты РЦПІ Гомельскай вобласці павіншавалі з Днём ведаў вучняў профільнага юрыдычнага 10 «Ю» класа ДУА «Гімназія № 56 г. Гомеля імя А.А.Вішнеўскага» і ўручылі падарункі ад НЦПІ.
Большасць навучэнцаў класа ўжо вызначылася з выбарам будучай прафесіі. Яны плануюць паступаць ва ўстановы вышэйшай адукацыі юрыдычнага профілю, таму на адкрытым уроку вучням было асабліва цікава даведацца аб дзейнасці Цэнтра, яго філіяла ў Гомельскай вобласці, а таксама аб дзяржаўных інфармацыйна-прававых рэсурсах.
Калектыў рэгіянальнага цэнтра прававой інфармацыі Гродзенскай вобласці павіншаваў выхаванцаў ДУА «Шчучынскі цэнтр карэкцыйна-развіццёвага навучання і рэабілітацыі», парадаваўшы дзяцей неабходнымі школьнымі прыналежнасцямі і салодкімі пачастункамі, пажадаўшы поспехаў і моцнага здароўя.
«Пачатак новага навучальнага года – гэта заўсёды пачатак важнага жыццёвага этапу. 1 Верасня – знамянальны дзень не толькі для вучняў, але і для іх настаўнікаў, а таксама бацькоў», – адзначыла дырэктар РЦПІ Гродзенскай вобласці Алена Капіца ў прывітальным слове.
1 Верасня адбылася сустрэча спецыялістаў РЦПІ г. Мінска з навучэнцамі 5 прававога класа сталічнай сярэдняй школы № 68. Работнікі Мінскага філіяла расказалі дзецям аб карысным інтэрнэт-рэсурсе для дзяцей і падлеткаў – Дзіцячым прававым сайце. Разам з пажаданнямі моцнага здароўя, поспехаў у навучанні і будучым дарослым жыцці вучні атрымалі памятныя падарункі ад НЦПІ да Дня ведаў.
Прадстаўнікі калектыву РЦПІ Мінскай вобласці наведалі ўрачыстую лінейку ДУА «Гімназія № 1 г. Дзяржынска».
Дырэктар РЦПІ Мінскай вобласці Руслан Трухан не толькі павіншаваў педагогаў, вучняў і іх бацькоў з Днём ведаў, але і ўручыў актыўным дзецям з Рэсурснага цэнтра, што функцыянуе на базе гімназіі, кнігі «Конституция Республики Беларусь» і «Правила дорожного движения».
Напрыканцы мерапрыемства Руслан Іванавіч разам з намеснікам старшыні Дзяржынскага райвыканкама Наталляй Яжовай і дырэктарам гімназіі Валерыем Скуратовічам уручылі першакласнікам кнігу «Беларусь – наша Радзіма» – падарунак ад Прэзідэнта Рэспублікі Беларусь Аляксандра Лукашэнкі.
1 Верасня работнікі РЦПІ Магілёўскай вобласці ўзялі ўдзел у гарадскім свяце «Дзеці за шчаслівую будучыню», арганізаваным у межах правядзення Дня ведаў у Магілёўскім парку Падміколле.
У рамках гарадскіх праектаў «Шчаслівая сям’я – шчаслівыя дзеці», «Армии воин – славы достоин» у гэты святочны дзень працавалі інтэрактыўныя і тэматычныя пляцоўкі, у тым ліку і прававая пляцоўка НЦПІ.
Дзецям была прадэманстравана работа Дзіцячага прававога сайта, арганізаваны гульні і конкурсы прававой тэматыкі. Ніхто не застаўся без падарунка ў святочны дзень: усім уручылі паветраныя шары і прызы ад НЦПІ.
Удзельнікі мерапрыемства атрымалі пазітыўныя эмоцыі, а таксама зарад дабра і энергіі на новы навучальны год.