0
19 красавіка ў Гомельскім аблвыканкаме адбыўся семінар-практыкум па пытаннях абавязковай юрыдычнай экспертызы і мясцовай нарматворчасці для прадстаўнікоў юрыдычных службаў, іншых структурных падраздзяленняў органаў мясцовага кіравання і самакіравання базавага тэрытарыяльнага ўзроўню вобласці.
У семінары прынялі ўдзел кіраўнік спраў Гомельскага аблвыканкама Алена Клічкоўская, дырэктар РЦПІ Гомельскай вобласці Яўгенія Майсейкіна, прадстаўнікі галоўнага ўпраўлення абавязковай юрыдычнай экспертызы нарматыўных прававых актаў Міністэрства юстыцыі.
У анлайн-фармаце далучыліся работнікі галоўнага ўпраўлення юстыцыі, кіраўнікі спраў і работнікі юрыдычных службаў райвыканкамаў і Гомельскага гарадскога выканаўчага камітэта.
Выступаючы з дакладам, Яўгенія Сямёнаўна расказала аб выніках праводзімай у рэгіёне работы па фарміраванні органамі мясцовага кіравання банкаў даных лакальных прававых актаў у складзе сістэмы «ЭТАЛОН», адзначыўшы перспектыўнасць гэтага напрамку.
«Фарміраванне банка гэтых лакальных прававых актаў з'яўляецца прыкладам эфектыўнага ўкаранення лічбавых тэхналогій у дзейнасць мясцовых органаў улады, якое дае магчымасць якасна вырашаць прафесійныя задачы, якія стаяць перад выканкамамі», – падкрэсліла кіраўнік РЦПІ Гомельскай вобласці.
На семінары разгледзелі актуальныя пытанні падрыхтоўкі прававых актаў і падыходы да правядзення абавязковай юрыдычнай экспертызы дакументаў мясцовых Саветаў дэпутатаў, выканаўчых камітэтаў базавага тэрытарыяльнага ўзроўню.
Завяршылася мерапрыемства падвядзеннем вынікаў штогадовага конкурсу сярод нарматворчых органаў базавага тэрытарыяльнага ўзроўню Гомельскай вобласці і супрацоўнікаў іх юрыдычных службаў. Пераможцам прызнаны Лельчыцкі раённы Савет дэпутатаў і Лельчыцкі раённы выканаўчы камітэт.
