0
Сёння калектыў НЦПІ прымае актыўны ўдзел у суботніку.
Праца ў будынку Цэнтра кіпіць. Усе работнікі прыйшлі сюды з мэтай зрабіць НЦПІ яшчэ больш утульным і прыгожым. У кожнага свае задачы. Для жаночай паловы – гэта ўборка кабінетаў, перасадка і паліванне кветак. А для мужчын – рамонт мэблі і навядзенне парадку ў кабінетах.
«Рэспубліканскі суботнік у НЦПІ – гэта шматгадовая добрая традыцыя, сумесная грамадска-карысная праца, уклад нашага калектыву ў вялікую стваральную працу па добраўпарадкаванні і прывядзенні ў парадак тэрыторый. Таксама гэта цудоўная магчымасць пагутарыць з калегамі на розныя тэмы, звязаныя не толькі з працай», – лічыць дырэктар НЦПІ Андрэй Матэльскі.
З энтузіязмам працуюць на карысць арганізацыі і прадстаўнікі моладзі – члены першаснай арганізацыі ГА «БРСМ» НЦПІ.
«Я люблю суботнікі яшчэ з дзяцінства, – расказвае спецыяліст Дар'я Будкоўская. – Гэтая радасная падзея - вясна, спяваюць птушкі, ва ўсіх добры настрой. Да таго ж фізічная праца – выдатны спосаб «пераключыцца». Такія мерапрыемствы даюць зарад бадзёрасці і пазітыву на ўвесь наступны тыдзень».
Многія работнікі традыцыйна прыйшлі на суботнік з дзецьмі.
У гэты дзень частка калектыва Цэнтра на чале з намеснікам дырэктара Вячаславам Бякетам працуе на «перадавой» – абнаўляюць лес у Лагойскім раёне.
«Сёння кожны з нас рады зрабіць свой ўкладу агульную справу, – адзначае Вячаслаў Мечыслававіч. – Ва ўсіх добры настрой, праца спорыцца. Саджаць дрэвы – вельмі добры і карысны занятак. Захаванне ляснога фонду – гэта важная задача для ўсіх. Толькі так мы зможам прымножыць прыродныя багацці нашай краіны для будучых пакаленняў».
«Мы заўсёды з вялікім энтузіязмам выязджаем на пасадку лесу, бо гэта вельмі карыснае мерапрыемства не толькі для нашай экалогіі, але і для саміх работнікаў. Падыхаць свежым паветрам, палюбавацца мясцовымі прыгажосцямі, заняцца фізічнай працай – што можа быць лепш?» – дзеляцца сваімі ўражаннямі работнікі Цэнтра.
У гэты дзень праца кіпіць і ў філіялах Цэнтра, работнікі якіх таксама прыклалі максімум намаганняў у навядзенні парадку на працоўных месцах і прылеглай да арганізацый тэрыторыі.
Даведачна
Заробленыя падчас суботніка грашовыя сродкі пойдуць на фінансаванне розных праектаў.
Так, 35 % будуць накіраваны Гомельскаму аблвыканкаму на рэканструкцыю мемарыяльнага комплексу «Дзецям – ахвярам вайны» ў населеным пункце Чырвоны Бераг (Жлобінскі раён). Столькі ж – Брэсцкаму аблвыканкаму на стварэнне рэспубліканскага цэнтра патрыятычнага выхавання моладзі на базе Кобрынскага ўмацавання ў Брэсцкай крэпасці.
Яшчэ 30 % – на рэканструкцыю і аднаўленне мемарыяльных комплексаў, месцаў баявой і воінскай славы, размешчаных у абласцях і Мінску.
