0
|
04.04.2012 Электроннае грамадства: зроблены чарговы крок
Издание : Чырвоная зорка
Автор статьи : Алег Краўцоў |
З 1 ліпеня 2012 года адзіным месцам афіцыйнага апублікавання прававых актаў стане Нацыянальны прававы інтэрнэт-партал Рэспублікі Беларусь.
Ролю ў грамадстве сістэмы афіцыйнага апублікавання прававых актаў цяжка пераацаніць, таму што менавіта з датай афіцыйнага апублікавання ў большасці выпадкаў непарыўна звязаны дата ўступлення прававога акта ў сілу і ўзнікненне ў далейшым адпаведных прававых наступстваў.
Прававыя акты будуць публікавацца ў зборніках прававых актаў «Нацыянальны рэестр прававых актаў Рэспублікі Беларусь», выпуск якіх ускладзены на Нацыянальны цэнтр прававой інфармацыі РБ. Прававыя акты таксама будуць надрукаваны ў афіцыйных перыядычных выданнях: у газетах «Советская Белоруссия», «Звязда», «Народная газета», «Рэспубліка» і выданнях, якія вызначаць мясцовыя Саветы дэпутатаў, выканаўчыя і распарадчыя органы. Аднак апублікаванне прававых актаў у вышэйназваных афіцыйных перыядычных друкаваных выданнях будзе з’яўляцца неафіцыйным.
Таксама вызначаецца парадак афіцыйнага апублікавання прававых актаў мясцовых Саветаў дэпутатаў, выканаўчых і распарадчых органаў пярвічнага тэрытарыяльнага ўзроўню. Яно будзе ажыццяўляцца шляхам размяшчэння тэкстаў прававых актаў у афіцыйных перыядычных друкаваных выданнях, вызначаных у адпаведнасці з заканадаўствам, на афіцыйных сайтах гэтых дзяржаўных органаў ці на адпаведных старонках афіцыйных сайтаў вышэйстаячых дзяржаўных органаў.
Бясспрэчная перавага выкарыстання віртуальнай прасторы глабальнай камп’ютарнай сеткі інтэрнэт заключаецца ў тым, што колькасць і аб’-ём прававых актаў, якія друкуюцца на партале, не абмяжоўваюцца ні часам, неабходным для паліграфічнага вырабу тыражу друкаванага выдання, ні перыядычнасцю выхаду яго ў свет, ні іншымі характарыстыкамі, уласцівымі матэрыяльнаму носьбіту (напрыклад, вызначаная колькасць старонак друкаванага нумара).
Падрыхтаваныя да апублікавання ў зручным для карыстальніка (чытача) фармаце тэксты прававых актаў штодзень будуць размяшчацца на партале, што дазволіць забяспечыць да іх вольны кругласутачны доступ.
