14 верасня адбыўся візіт кіраўнікоў НЦПІ Андрэя Матэльскага і НЦЗПД Вадзіма Іпатава ў Навукова-практычны цэнтр праблем умацавання законнасці і правапарадку Генеральнай пракуратуры Рэспублікі Беларусь.
У ходзе візіту абодва дырэктары ад імя калектываў павіншавалі Васіля Марчука з 60-годдзем.
«Нашы арганізацыі звязвае шматгадовае і плённае супрацоўніцтва, – асабліва падкрэсліў дырэктар НЦПІ Андрэй Матэльскі. – У прыватнасці, рэалізацыя сумесных праектаў, накіраваных на інфармацыйнае развіццё банка даных «Правапрымяняльная практыка» з уключэннем аналітычных і метадычных матэрыялаў работнікаў органаў пракуратуры, практыкі пракурорскага нагляду спрыяе ўдасканаленню інфармацыйна-прававога забеспячэння праваахоўных органаў, даступнасці неабходнай у прафесійнай дзейнасці прававой інфармацыі».
За значны асабісты ўклад у развіццё дзяржаўнай сістэмы прававой інфармацыі Васіль Марчук узнагароджаны Ганаровай граматай НЦПІ.
Дырэктар НЦПІ адзначыў, што навукова-практычны цэнтр, які узначальвае Васіль Марчук, з'яўляецца унікальнай установай, дзе навуковы калектыў паспяхова вырашае самыя складаныя задачы ў галіне экспертнай ацэнкі праектаў нарматыўных прававых актаў, метадычнага забеспячэння дзейнасці органаў пракуратуры, распрацоўкі прапаноў па супрацьдзеянні карупцыі, павышэнні законнасці і правапарадку:
– Вы паспяхова рэалізуеце сябе як на прафесійнай, так і на навуковай ніве. Вашы веды і вопыт у справе вырашэння задач па правядзенні крыміналагічных даследаванняў, удасканаленні метадалогіі правядзення крыміналагічнай экспертызы праектаў нарматыўных прававых актаў, выпрацоўцы прапаноў па ўдасканаленні праваахоўнай дзейнасці, умацаванню законнасці і правапарадку па праву прызнаны на радзіме і за мяжой.
Даведачна
Марчук Васіль Васільевіч, кандыдат юрыдычных навук, дацэнт. Працаваў выкладчыкам, старшым выкладчыкам, дацэнтам кафедры крымінальнага права юрыдычнага факультэта Беларускага дзяржаўнага ўніверсітэта (1990–2015 гг.). З 2017 года ўзначальвае Навукова-практычны цэнтр праблем умацавання законнасці і правапарадку Генеральнай пракуратуры Рэспублікі Беларусь. Аўтар звыш 350 навуковых прац.