12-14 жніўня НЦПІ прыняў удзел у турысцкім злёце, арганізаваным у рамках праграмы XXIII рэспубліканскай спартакіяды работнікаў апаратаў органаў дзяржаўнага кіравання.
Маштабнае турыстычнае мерапрыемства традыцыйна праходзіла на беразе Нёмана на Стаўбцоўшчыне, удзел у ім узялі 16 каманд. Для Цэнтра яно праходзіла пад дэвізам «Нам – 25 гадоў!»
Цёплае сонечнае надвор'е, маляўнічае месца на паляне базы ТАК «Высокі Бераг» і галоўнае – спартыўныя спаборніцтвы і конкурсы, у ходзе якіх лепшыя з лепшых маглі паказаць сваю сілу, хуткасць і творчыя здольнасці. Усе ўдзельнікі прадэманстравалі добрую падрыхтоўку, творчы падыход і волю да перамогі.
Каманды спаборнічалі ў спартыўным арыентаванні, тэхніцы воднага, пешаходнага і веласіпеднага турызму.
Культурная частка праграмы дапамагла раскрыць творчы патэнцыял удзельнікаў. А конкурсы візітак і нумароў сталі яшчэ адным яркім штрыхом мерапрыемства. У выступленнях была адлюстравана асноўная тэматыка турыстычнага злёту – Год гістарычнай памяці. Свае індывідуальна аформленыя палатачныя гарадкі каманды прэзентавалі ў конкурсе турысцкіх навыкаў і побыту, а таксама прадэманстравалі членам журы свае кулінарныя здольнасці.
Каманда НЦПІ атрымала перамогу ў творчых конкурсах «Прадстаўленне каманд» і эстраднай песні, не пакінуўшы ніякіх шанцаў іншым удзельнікам.
У скарбонцы спартыўных дасягненняў НЦПІ – першае месца ў спаборніцтвах па веласіпедным турызме і тэхніцы пешаходнага турызму.
Па выніках спаборніцтваў каманда заняла другое агульнакаманднае месца.
Пераможцы і прызёры былі ўзнагароджаны дыпломамі і памятнымі прызамі. Па словах прадстаўнікоў каманды НЦПІ, мерапрыемства прайшло на «ўра» і пакінула ў памяці мноства радасных момантаў і незабыўных уражанняў.
«Перш за ўсё, хочацца адзначыць высокі ўзровень арганізацыі спартыўнай падзеі, якая кожны год аб'ядноўвае работнікаў розных ведамстваў. Гэты год не стаў выключэннем: мерапрыемства сабрала самыя крэатыўныя сілы калектыву НЦПІ ўсіх узростаў. Па выніках спаборніцтваў наша каманда заваявала срэбра, толькі крыху саступіўшы сапернікам з Міністэрства лясной гаспадаркі, – адзначыў дырэктар НЦПІ Андрэй Матэльскі. – Аднак з упэўненасцю можна сказаць, што прайграўшых тут не было.Турзлёт – гэта не толькі праверка на «трываласць» і ўмацаванне каманднага духу, у Год гістарычнай памяці – гэта яшчэ магчымасць успомніць пра подзвігі нашых дзядоў і прадзедаў з падзякай за магчымасць жыць пад мірным небам, працаваць, развівацца самім і развіваць наш Цэнтр».
Віншуем усіх удзельнікаў! Імкнемся да новых вяршыняў!