0
9 верасня РЦПІ Гродзенскай вобласці прыняў удзел у святочным мерапрыемстве, прысвечаным святкаванню 20-годдзя Беларускага рэспубліканскага саюза моладзі.
У гэты дзень у Гродне прайшоў абласны маладзёжны форум «БРСМ: 20 гадоў разам!», які стаў своеасаблівым дыялогам пакаленняў. Мерапрыемства аб'яднала маладзёжны актыў і тых, хто стаяў ля вытокаў стварэння арганізацыі.
Са знакавай датай арганізацыю ад імя НЦПІ павіншавала спецыяліст па забеспячэнні асноўнай дзейнасці РЦПІ Гродзенскай вобласці Ала Бондар. Паводле яе слоў, у Гродзенскім рэгіёне заўсёды паспяхова выконваюцца падпісаныя паміж Цэнтрам і БРСМ Партнёрскае пагадненне і План мерапрыемстваў у галіне развіцця і ўдасканалення дзяржаўнай сістэмы прававой інфармацыі. У сваім выступленні Ала Уладзіміраўна падкрэсліла важнасць супрацоўніцтва па асвеце моладзі, зрабіла акцэнт на прававым выхаванні новага пакалення як найважнейшай умове развіцця прававой культуры грамадства.
Кіраўніцтву БРСМ быў уручаны падарунак ад Цэнтра – абноўленае выданне Канстытуцыі і сувенірная прадукцыя.
Удзел у мерапрыемстве таксама прынялі начальнік галоўнага ўпраўлення ідэалагічнай работы і па справах моладзі аблвыканкама Ігар Булаўко, старшыня абласнога Савета ветэранаў Іван Тустаў, старшыня Гродзенскага абласнога аб'яднання прафсаюзаў Барыс Казялкоў, рэктар Гродзенскага дзяржаўнага медуніверсітэта Ігар Жук, рэктар Гродзенскага дзяржаўнага ўніверсітэта імя Янкі Купалы Ірына Кітурко і іншыя.
Падчас сустрэчы ўдзельнікі абмяняліся вопытам працы, а таксама азначылі планы на будучыню.
Даведачна
Беларускі рэспубліканскі саюз моладзі і НЦПІ звязвае шматгадовае партнёрства ў пытаннях прававога выхавання моладзі. Цэнтр ініцыюе і актыўна ўдзельнічае ў правядзенні асветніцкай работы і сумесных мерапрыемстваў з БРСМ, выступаючы іх суарганізатарам і інфармацыйным партнёрам. У 2021 годзе БРСМ і НЦПІ ўпершыню замацавалі на паперы асноўныя напрамкі ўзаемадзеяння, падпісаўшы Партнёрскую дамову і План мерапрыемстваў. У 2022 годзе пагадненне было перазаключана з улікам новых напрамкаў узаемадзеяння.
