Работнікі НЦПІ наведалі міжнародную выставу «Сальвадор Далі» самага вядомага мастака сюррэалізму, якая праходзіць у Нацыянальным мастацкім музеі Рэспублікі Беларусь.
У экспазіцыі прадстаўлены больш за 100 твораў скульптуры, графікі, ювелірнага і дэкаратыўна-прыкладнога мастацтва, якія створаны адным з найвялікшых мастакоў ХХ стагоддзя. Выстаўленыя экспанаты з’яўляюцца часткай калекцыі «Сусвет Далі» (Dali Universe), што лічыцца адным з найбуйнейшых прыватных збораў скульптуры і дэкаратыўна-прыкладнога мастацтва Сальвадора Далі. Творы з гэтай калекцыі былі прадстаўлены ў больш за ста прэстыжных музеях і месцах па ўсім свеце. Нават праз трыццаць гадоў пасля смерці майстра ўплыў яго мастацтва можна ўбачыць амаль паўсюль у свеце.
Такая незвычайная калекцыя дазволіла раскрыць для наведвальнікаў малавядомыя аспекты работы Далі, а захапляльныя і пазнавальныя апавяданні экскурсаводаў пакінулі яркія і незабыўныя ўражанні ад наведвання выставы.