0
25 студзеня НЦПІ праведзены занятак у Беларускай дзяржаўнай харэаграфічнай гімназіі-каледжы, размешчанай у г. Мінску.
Ён накіраваны на павышэнне прававой пісьменнасці і культуры вучняў 8 класаў установы адукацыі.
Мастацтва харэаграфіі (танца) ‒ выдатны сродак выхавання і развіцця чалавека. Яно, як і права, узбагачае дзіця і дапамагае раскрыцца яго асобе. Да таго ж права – гэта таксама мастацтва. Яшчэ старажытнарымскія прававеды лічылі, што «права – гэта мастацтва дабра і справядлівасці». Бо, як вядома, нормы права заснаваныя ў тым ліку і на нормах маралі і з'яўляюцца гарантам захавання іх у грамадстве.
Падчас заняткаў юныя таленты даведаліся, дзе асвоіць мастацтва права. Памочнікам ім у гэтым стане Дзіцячы прававы сайт. У любы час, незалежна ад абставін тут можна зайсці ў «Прававую бібліятэку», пачытаць «Карысную інфармацыю», вывучыць юрыдычную азбуку ў буквары прававых тэрмінаў і паняццяў, папоўніць свой запас ведаў у банку даных «Свет права», нават уступіць у дыялог з юрыстамі ў рубрыцы «Задай пытанне», вырашыць праблемныя сітуацыі з медыятарам і членамі Нацыянальнай камісіі па правах дзіцяці. Таксама пагуляць і прыняць удзел у конкурсах, віктарынах, турнірах і смартмобах.
«Асабліва мне спадабаўся раздзел сайта «Правы па гадах», – заўважыў адзін з хлопцаў. – Тут я знайшоў цікавую для сябе інфармацыю аб працы, пакупках, спадчыне, сямейным заканадаўстве».
Многім з гімназістаў ужо споўнілася 14 гадоў. Менавіта з гэтага ўзросту пералік правоў юных грамадзян пашыраецца. Пра гэта важна і трэба ведаць. Таксама варта памятаць і аб адказнасці за свае дзеянні. Дзіцячы прававы сайт заўсёды ў дапамогу!
Ведай правы, вучыся, гуляй – усё гэта на mir.pravo.by.
