У Мінску 17 снежня 2019 года адбылася міжнародная навукова-практычная канферэнцыя “Роля юрыдычнай навукі ў працэсах удасканалення заканадаўства і практыкі яго выкарыстання», прымеркаваная да 10-годдзя часопіса Нацыянальнага цэнтра прававой інфармацыі «Право.by»
«Гэты юбілей можна лічыць не толькі падзеяй лакальнага маштабу, ён варты мерапрыемства міжнароднага ўзроўню. Часопіс «Право.by» добра вядомы ў краіне і за яе межамі, зрабіўся значным беларускім прававым навуковым выданнем. За 10 гадоў у свет выйшла 58 выпускаў, больша за 1500 арыгінальных навуковых матэрыялаў сталі часткай глабальнай прававой інфармацыйнай прасторы. Лепшыя са сваіх матэрыялаў нам даверылі амаль 300 кандыдатаў і дактароў навук, а таксама больш за 500 прадстаўнікоў дзяржаўных органаў і арганізацый, прадстаўнікоў бізнэсу. 6 тэматычных нумароў часопіса былі прысвечаныя актуальным пытанням сучаснага прававога развіцця дзяржавы і грамадства, удасканалення нацыянальнага заканадаўства, замежнаму досведу прававога рэгулявання грамадскіх адносін», – сказаў у сваім прывітальным слове дырэктар Нацыянальнага цэнтра прававой інфармацыі Яўген Каваленка.
«Право.by» чытаюць усе, хто мае дачыненне да юрыспрудэнцыі: студэнты, выкладчыкі, суддзі і пракуроры, натарыусы і адвакаты», – пацвердзіла першы намеснік дырэктара Нацыянальнага цэнтра заканадаўства і прававых даследванняў Галіна Падразёнак.
У межах мерапрыемства адбылося ўзнагароджанне аўтараў часопіса. У намінацыі «Аўтар, які мае больш за ўсё публікацый» адзначаны Аляксандр Піліпенка, дацэнт кафедры фінансавага права і прававога рэгулявання гаспадарчай дзейнасці юрыдычнага факультэта БДУ, Ірына Чупракова, намеснік кіраўніка ўпраўлення – кіраўнік аддзела навукова-метадычнага забеспячэння прававой інфарматызацыі ўпраўлення прававой інфарматызацыі НЦПІ, Уладзімір Скобелеў, дацэнт кафедры грамадзянскага працэсу і працоўнага права юрыдычнага факультэта БДУ.
У намінацыі «За папулярызацыю навуковых выданняў у сферы прававой інфарматызацыі» узнагароджаны Віктар Шаршун, намеснік дырэктара НЦПІ, і Марына Сатоліна, загадчык сектара прававога забеспячэння сацыяльна-эканамічнага развіцця Цэнтра дзяржаўнага будаўніцтва і права Інстытута эканомікі Нацыянальнай акадэміі навук Беларусі.
Адмысловым дыпломам за ўнёсак у развіццё і прасоўванне часопіса адзначаны Аляксандр Браусаў, адказны сакратар рэдкалегіі выдання, кіраўнік упраўлення прававой інфарматызацыі НЦПІ.
Уручыў узнагароды галоўны рэдактар часопіса «Право.by», дэкан юрыдычнага факультэта БДУ Сяргей Балашэнка. «Юбіляра, як вядома, упрыгожвае не ўзрост, а справы, – зазначыў ён падчас свайго выступлення. – Кожны нумар нашага часопіса мы намагаліся зрабіць узорам удумлівага, кампетэнтнага асвятлення праблемных пытанняў у сучасным праве і прававой інфарматызацыі. Садзейнічалі пошуку шляхоў вырашэння прававых задач і калізій, ліквідацыі прабелаў заканадаўства».
Таксама ўдзельнікі навукова-практычнай канферэнцыі паслухалі і абмеркавалі даклады аб навуковай дзейнасці НЦПІ як фактары лічбавай трансфармацыі нацыянальнай прававой сістэмы, пытаннях навуковага забеспячэння нарматворчай дзейнасці, нюансах супрацоўніцтва дзяржаў – чальцоў Савета Еўропы ў галіне судовых працэсаў, міждысцыплінарнасці і комплексных падыходах у навуковых даследваннях у якасці ўмоў эфектыўнасці заканадаўства, ролі юрыдычнай навукі ў ліквідацыі прабелаў заканадаўства, прынцыпе навуковасці ў канструяванні крымінальнага закона, уплыве прававой дактрыны на фарміраванне і развіццё міжнароднага права і другіх тэмах.
У канферэнцыі прынялі ўдзел больш за 60 кіраўнікоў і экспертаў дзяржаўных органаў і арганізацый, навукова-даследвацельскіх цэнтраў і інстытутаў, прадстаўнікоў прафесарска-выкладчыцкага саставу вядучых устаноў адукацыі краіны, міжнародна прызнаных даследчыкаў у галіне права, экспертаў Савета Еўропы.
Арганізатары мерапрыемства – Нацыянальны цэнтр прававой інфармацыі і Савет Еўропы.