18 мая Прэм'ер-міністр Беларусі ўручыў дзяржаўныя ўзнагароды прадстаўнікам розных сфер у адпаведнасці з Указам Кіраўніка дзяржавы ад 10 лютага 2023 г. нумар 34. Сярод узнагароджаных медалём «За працоўныя заслугі» – дырэктар РЦПІ Гродзенскай вобласці Алена Капіца.
«Сёння мы дзякуем вам за працу, талент і адданасць сваёй справе. На гэтай цырымоніі прысутнічаюць найлепшыя прадстаўнікі працоўных калектываў нашай краіны. Па даручэнні Прэзідэнта Беларусі заслужаныя дзяржаўныя ўзнагароды сёння ўручаны тым, хто з гонарам рэалізуе значныя інвестыцыйныя праекты, рухаецца наперад і сваёй стараннасцю і працай уносіць значны ўклад у развіццё нашай краіны», – сказаў Раман Галоўчанка на цырымоніі ўзнагароджання.
Алена Мікалаеўна ўзначальвае рэгіянальны філіял з моманту яго стварэння ў 1999 годзе.
Пад яе кіраўніцтвам РЦПІ паспяхова рэалізуе задачы па развіцці дзяржаўнай сістэмы прававой інфармацыі і павышэнні прававой пісьменнасці грамадзян у рэгіёне.
За гады яе працы дасягнуты значныя вынікі. Наладжана эфектыўнае ўзаемадзеянне з дзяржорганамі і арганізацыямі Гродзеншчыны ў рамках забеспячэння іх сістэмамі «ЭТАЛОН» і «ЭТАЛОН-ONLINE», а таксама ўкаранення электроннага дакументаабароту пры падрыхтоўцы і прыняцці прававых актаў з дапамогай лакальных банкаў гэтых прававых актаў.
Толькі за апошнія пяць гадоў карыстальнікам рэгіёну прадастаўлена амаль 10 тысяч камплектаў ІПС «ЭТАЛОН», а колькасць доступаў на ІПС «ЭТАЛОН-ОNLINE» павялічылася ў 12 разоў. РЦПІ вядзецца планамерная работа па павышэнні прававой культуры насельніцтва. Дзякуючы супрацоўніцтву з абласным упраўленнем культуры ў рэгіёне створаны і паспяхова развіваюцца 104 цэнтры доступу да прававой інфармацыі на базе бібліятэк. Яны не толькі даюць магчымасць атрымаць грамадзянам неабходную прававую інфармацыю, але з'яўляюцца пляцоўкай для рэалізацыі сумесных праектаў з адвакатурай і натарыятам.
Прававой інфармацыяй забяспечваюцца ўстановы адукацыі, сацыяльна-педагагічныя цэнтры, цэнтры карэкцыйна-развіваючага навучання і рэабілітацыі, тэрытарыяльныя цэнтры сацыяльнага абслугоўвання насельніцтва, дамы-інтэрнаты для дзяцей-інвалідаў.
Вялікая ўвага надаецца правядзенню мерапрыемстваў, накіраваных на рэалізацыю прыярытэтных напрамкаў дзяржаўнай маладзёжнай палітыкі, у тым ліку па прававым выхаванні падрастаючага пакалення.
Дзякуючы намаганням Алены Мікалаеўны за гады работы філіяла эфектыўна наладжана супрацоўніцтва з рэгіянальнымі арганізацыямі рэспубліканскіх грамадскіх аб'яднанняў і навучальнымі ўстановамі. Пры яе непасрэдным удзеле на базе Гродзенскага дзяржуніверсітэта імя Янкі Купалы створана аддзяленне кафедры ЮНЕСКА па інфармацыйных тэхналогіях і праве НЦПІ. Пазней менавіта па ініцыятыве кіраўніка РЦПІ на яго базе адкрыты і дзейнічае філіял кафедры тэорыі і гісторыі дзяржавы і права гэтага ўніверсітэта.
Рэгулярна праводзяцца навучальныя семінары па рабоце з дзяржаўнымі інфармацыйна-прававымі рэсурсамі, а таксама іншыя мерапрыемствы, накіраваныя на азнаямленне з дзейнасцю НЦПІ. Як адзначаюць калегі, Алена Мікалаеўна – сапраўдны прафесіянал сваёй справы, кампетэнтны кіраўнік, які на практыцы актыўна прымяняе нестандартныя рашэнні, творчы падыход, прадуктыўна выкарыстоўвае свой жыццёвы і прафесійны вопыт:
«Яна заўсёды гатова дзяліцца вопытам і ведамі, зараджае аптымізмам і сваім прыкладам стымулюе нас да асабістага і прафесійнага росту».
Віншуем Алену Мікалаеўну з высокай узнагародай і жадаем ёй далейшых поспехаў па развіцці сістэмы прававой інфармацыі нашай краіны!
Відэа з цырымоніі ўзнагароджання глядзіце тут.