ДІПР у дапамогу пры абароне правоў спажыўцоў: у РЦПІ г.Мінска прайшоў круглы стол

16 сакавіка ў рамках мерапрыемстваў, прымеркаваных да Дня спажыўца, які адзначаецца штогод 15 сакавіка, РЦПІ г. Мінска арганізавана правядзенне круглага стала па тэме «Актуальныя пытанні абароны правоў і законных інтарэсаў спажыўцоў тавараў (работ, паслуг)».

У мерапрыемстве прынялі ўдзел прадстаўнікі Міністэрства антыманапольнага рэгулявання і гандлю, Белдзяржуніверсітэта, ГА «Рэгіянальнае таварыства абароны правоў спажыўцоў», ДУ «Цэнтралізаваная сістэма публічных бібліятэк г. Мінска», адміністрацыі Маскоўскага раёна г. Мінска.

Абарона правоў спажыўцоў – адзін з важных напрамкаў дзяржаўнай палітыкі на сучасным этапе, а 2023 год у ЕАЭС праходзіць пад дэвізам «Грамотны спажывец – адказны бізнес». У нашай краіне дзейнічае шэраг нарматыўных прававых актаў, якія складаюць прававую аснову для абароны правоў спажыўцоў.

Як адзначыў дырэктар РЦПІ г. Мінска Руслан Века, любы грамадзянін можа атрымаць доступ да актуальнай прававой інфармацыі па гэтай тэматыцы з дапамогай дзяржаўных інфармацыйна-прававых рэсурсаў.

«У рамках забеспячэння функцыянавання і развіцця дзяржаўнай сістэмы прававой інфармацыі ў г. Мiнску адкрытыя і функцыянуюць 33 публічныя цэнтры прававой інфармацыі, у якіх кожны грамадзянін на бязвыплатнай аснове можа не толькі атрымаць доступ да афіцыйнай прававой інфармацыі, але і бязвыплатную кансультацыю ад прадстаўнікоў Мінскай гарадской калегіі адвакатаў, натарыяльнай палаты і рэгіянальнага таварыства абароны спажыўцоў. Гэта работа дае магчымасць павышаць прававую дасведчанасць і прававую пісьменнасць насельніцтва, што дае магчымасць грамадзянам паспяхова забяспечваць рэалізацыю і абарону сваіх правоў, у тым ліку ў якасці спажыўцоў», – падкрэсліў Руслан Віктаравіч.

Падчас круглага стала абмеркавалі пытанні дзяржаўнай палітыкі ў акрэсленай сферы, разгледзелі вынікі працы па кансультаванні грамадзян, а таксама апошнія тэндэнцыі ў галіне абароны правоў спажыўцоў. Па выніках работы і абмеркавання сфарміраваны прапановы па перспектыўных напрамках работы ў гэтай сферы.

У якасці спікераў таксама выступілі начальнік упраўлення абароны правоў спажыўцоў і кантролю за рэкламай Міністэрства антыманапольнага рэгулявання і гандлю Іна Гаўрыльчык, прадстаўнікі ГА «Рэгіянальнае таварыства абароны правоў спажыўцоў», юрыдычнага факультэта Беларускага дзяржаўнага ўніверсітэта.