0
20 снежня на пляцоўцы Магілёўскага абласнога выканаўчага камітэта прайшоў семінар-практыкум з прадстаўнікамі нарматворчых органаў Магілёўскага рэгіёна.
Удзел у мерапрыемстве прынялі кіраўнікі і спецыялісты юрыдычных службаў мясцовых органаў улады базавага тэрытарыяльнага ўзроўню, якія ўдзельнічаюць у распрацоўцы нарматыўных прававых актаў і тэхнічных нарматыўных прававых актаў, прадстаўнікі РЦПІ Магілёўскай вобласці. У фармаце відэаканферэнцсувязі да работы семінара далучыліся супрацоўнікі НЦПІ і Міністэрства юстыцыі.
На семінары абмеркавалі праблемныя пытанні, што ўзнікаюць пры падрыхтоўцы прававых актаў, а таксама пры забеспячэнні метадалагічнага суправаджэння дзейнасці нарматворчых органаў па падрыхтоўцы і накіраванні прынятых актаў на абавязковыя юрыдычныя экспертызы.
Аб правядзенні абавязковай юрыдычнай экспертызы тэхнічных нарматыўных прававых актаў і актуальных пытаннях яе прававога рэгулявання расказала супрацоўнік НЦПІ Марына Буміна. Спецыяліст Цэнтра Ганна Калеснікава азнаёміла слухачоў з асноўнымі палажэннямі работы з аўтаматызаванай інфармацыйнай сістэмай, якая забяспечвае фарміраванне Нацыянальнага рэестра прававых актаў Рэспублікі Беларусь, а таксама з патрабаваннямі, што прад’яўляюцца да тэхнічных нарматыўных прававых актаў у электронным выглядзе.
Аб выкарыстанні дзяржаўных інфармацыйна-прававых рэсурсаў у рабоце дзяржаўных органаў падрабязна расказала дырэктар РЦПІ Магілёўскай вобласці Наталля Станкевіч. Яна асвятліла прынцыпы функцыянавання дзяржаўнай сістэмы прававой інфармацыі, якая гарантуе кожнаму чалавеку магчымасць рэалізацыі свайго канстытуцыйнага права на атрыманне поўнай, дакладнай, афіцыйнай прававой інфармацыі, падкрэсліла ролю НЦПІ ў экспертна-аналітычнай дзейнасці сістэмы, правяла навучальны практыкум па рабоце з дзяржаўнымі інфармацыйна-прававымі рэсурсамі.
Усім удзельнікам семінару былі ўручаны сертыфікаты аб праходжанні навучання рабоце з дзяржаўнымі інфармацыйна-прававымі рэсурсамі – інфармацыйна-пошукавымі сістэмамі «ЭТАЛОН-ONLINE» і «ЭТАЛОН».
